happy GEETA jayanti...

મોરલી મનોહર
મોહનના
મનોમંથનથી
માખણ મિસરી માફક
મળેલું મધુર માધુર્ય
મતલબ "મા' ગીતા"...jn

છેલ્લો દિવસ...

છેલ્લો દિવસ.... હા હું છેલ્લો 

દિવસ મુવીની જ વાત કરું છું.

એ જોતાની સાથેજ કેટલીએ 

લાગણીઓ આજે તાજી થઇ ગઇ.

આજે પણ એ દિવસો નજર સામે

રમે છે, એક એક મારા વિધ્યાર્થીઓ

અને એમની મારા પ્રત્યેની લાગણી..

સામાન્ય રીતે બાળક શાળામાં

જવા માટે પગ પછાડે અને મારા

બાળકો રાહ જોઇને બેઠા હોય ક્યારે

શાળામાં પહોચીશું..!

એનું કારણ કદાચ એજ હશે એ બાળકો 

મને ક્યારેય પારકા લાગ્યાજ નથી.

આજે તો હવે ટેકનોલોજીનો જમાનો,

facebook કે whatsup જેવા માધ્યમમાં

કેટલાય વિધ્યાર્થીઓની શિક્ષકદીનની

જ્યારે શુભેચ્છાઓ મને મળી ત્યારે 

ખરેખર મનમા ગલગલીયા થયા

મને મારી જ પીઠ થાબડવાનું મન

થઇ આવ્યું, ને મન ફરી એકવાર

મનમાં એક પંક્તિ ગુનગુનાવા લાગ્યું 

ચાલ ફરી એકવાર મારે શાળાએ જવું છે.

જોત જોતામાંજ વેકેશન પુરુ ને

ફરી એકવાર મન ભૂતકાળમાં સરી

આંટો મારીને પાછું વર્તમાનમાં

દોડવા લાગ્યું.

હવે તો મને પણ એમ થાય કે આ 

વેકેશન કદાચ ના આવે તો વધુ સારું...

ત્યાંજ સ્કૂલ બેલના ટકોરા સાથે

મારી તંદ્રા તૂટી ને ફરી એકવાર 

હું મારા મનગમતા કામની સાથે 

મારા ક્લાસમાં મારા બાળકોમાં

એકાકાર બની મારા જગતમાં 

ખોવાઇ ગઇ....jn

દિવાની...

રાતભર વાંસળી વાગી..
ને હું હાંફળી ફાંફળી જાગી...

પડખા બદલતી આમતેમ..
ઝણકારમાં ઝાંઝરી વાગી...

રાસ રચાયો  મધુવનમાં..
જોગન બની બાવરી ભાગી...

આંખ ખૂલી ને જોઉં ત્યાં તો..
ભાળી આખી નગરી બાગી...

યમુના કિનારે જગતાત પુકારે..
ભરતા પાણી ગાગરી ભાંગી...jn

ઘર...ગઝલ...

મારા વિચારને દિલમાં પણ મળ્યું છે ઘર..
નર-નારના મિલન પર આજે બન્યું છે ઘર...

ભવભવ છે સાથ આ સમણાના જગત મહી..
દિલના ભલા લગાવ થકી તો ચણ્યું છે ઘર...

ઠોકરને પણ બનાવશુ આજે શીખામણો..
પરિપક્વતા જડી ને જો પાછું વળ્યું છે ઘર...

વાખ્યા છે દ્વાર તેં પણ મનના તને શું કહું..!
ખોલીને જો મને જ ફરીથી જડ્યું છે ઘર...

સ્વર્ગ છે અહીં, આ જે "જગત" છે તે આપણું..
તો ફરી ફરીને ક્યાં મળશે જે મળ્યું છે ઘર..?..jn

તારો અંશ...ગઝલ...

ખૂબ મોટું હ્રદય છે, છતાં હું એ સાગર નથી..
ખુશ્બુથી એ ભરેલું જીવન છે પણ અત્તર નથી...

આજીવન પીશ કડવાશ હું, જે તમે આપશો..!
ઘુંટડા ઝેરના પીશું જ ભલે ને શંકર નથી...

ફુલ જેવા નરમ દિલનો, ને મનનો મક્કમ ખરો..
આવતા ઘા સહજમાં ખમું, તોય પત્થર નથી...

માનવીના આ મન આમ વાંચી બતાડું ભલે..
બંધ આંખે અપાતા વચન કોઇ મંતર નથી...

અંશ છું હું તમારો અલગ તો નથી, કેમ કે..
આ જગતનો તો જગદીશ છું તોય ઇશ્વર નથી...jn

બંધન....ગઝલ...

આવી ગઇ છે એને પાંખો..
ભાવી ગઇ છે એની આંખો...

ક્યાંય સુધી રેવું માળામાં..
ખૂલી થઇ છે હવે તો પાંખો...

સંતાઇ ને ક્યાં જોવાના છે..!
ચાહનારા છે તમને લાખો...

ઢળવા લાગી છે હવે રોશની..
પ્રેમ પ્રકાશ જો થઇ ગ્યો ઝાંખો...

થઇ ગઇ ખીલીને વેગીલી..
ચાલો કોઇતો નાથ ને નાખો...jn

"મા"

"મા" ના ધાવણ પછી
જો કોઇ શ્રેષ્ઠ ટોનીક હોય
તો તે માતૃભાષા છે...jn

જીવન...

હોઠના જામ જેવું બીજું કોઇ ગળપણ હોય તો કે..!
આ સંબંધ જેવું બીજું કોઇ સગપણ હોય તો કે..!!

જીવન આખું જીવ્યા ને હજુએ જીવવાના..
મોજમાંજ રહેવા જેવું બાળપણ હોય તો કે..!!

અદેખી ને મતલબી બની બેઠી છે આ દુનિયા..
છતાં પણ ગામડા જેવું ભોળપણ હોય તો કે..!!

બધુંજ તો તારું ને અમે પણ તારા જ છીએ..
છે ઇશ્વર સંગ જેવું શાણપણ હોય તો કે..!!

"જગત"ના રંગો કેટલા નીરાળા હોય છે..
ખૂબ ખુશ છું, કહેવા જેવું ઘડપણ હોય તો કે..!!.jn

એકલતા...

ઝંખના પણ કેવી કરી, કદીએ પુરી થવાની નથી..
વિસરાઇ ગએલી પળો પાછી વળવાની નથી...

મૃગજળ જેવું કાંઇ જોયું ને લગાવી દોડ..
તરસ હતી ભીતરે પણ એમ છીપાવાની નથી...

અતીતની યાદો પણ હવે તો ખૂટવા લાગી..
હવે એ કાલ કંઇ આજ બની આવવાની નથી...

આજીવન તમને ન્યોછાવર કરેલું છે અમે..
આવતા ભવની તો વતો, કોઇ મળવાની નથી...

ડગલેને પગલે યાદ કરીશ હવે આ જગતમાં..
હજારો મળશે તોય આ એકલતા જવાની નથી...jn

જગતનો જગદીશ...તરહી...ગઝલ...

સુતો છે ઓઢીને આસમાની રજાઇમાં એને ઉગાડવો છે...
અઢીસો  મણની તળાઇ ઓઢી સુતેલ રસ્તો જગાડવો છે..*

તમે જો આવો અમારે આંગણે,  બની નવોઢા સજી ધજીને..
વળી વળીને એ ઓરડાને હજુ અમસ્તો સજાવવો છે...

કરી ઉભો એક એક દિલમાં ઉજાસ સાથે ઉમંગને પણ..
હ્રદય ઝરૂખે ફરી એ પાછો દિપોત્સવને મનાવવો છે...

ગલી ગલીમાં ફરી ફરીને નમે છે, માનવ થયો નમાલો..
હવે જગાડી એનું જ ગૌરવ, એ ઇશને ખોળે રમાડવો છે...

વિચારજો, આ હ્રદય રમાડીને જઇ શકો છો તમે તમારું..!
હવે તમારા જગતનો જગદીશ આજ એને બનાવવો છે...jn

પ્રેમ એટલે...

મારા સંપૂર્ણ
સમર્પણ સાથે
તારું મારા ભાલ પર
કરેલું એક ચુંબન
મારા અધરની
અધીરાઇથી
હજારો ગણું વેગીલું
ને નિરપેક્ષ મને
આલીંગનમાં ભરવું....jn

ચાલ રમીએ....

ચાલ રમીએ..
માટીમાં ઘર ઘર..
આપણે બેજ...

ના કોઇ આશ..
ના કોઇ રોક ટોક..
મન.. માલીક...

હું લાવું માટી..
તું લઇ આવ પાણી..
રમીએ ભેળા...jn

જગત..ગઝલ...

આજ મન જુઓ ફરી મલકાય છે..
આપને જોતા નયન હરખાય છે...

લાખ કોશીશો ભલે કરતાં તમે..
લાગણીતો તોય લો છલકાય છે...

કેટલા પહેરાને આમજ રાખશો..!
આ હ્રદયના તાર ક્યાં બંધાય છે...!

દંભ તો નઇ હોય, મજબૂરી હશે..!
આજ મુખે આપના ઝંખાય છે...

અવતરણ પાછું કરીએ આ ભવે..
આ "જગત" ક્યાં કોઇનું લુંટાય છે..!.jn

બોલ લૌ...!!

તારી આંખોમાં..
જાણે સાગર હોય..!!
એક બુંદ લૌ...??

તારા વિચાર
જાણે વૈકુંઠ હોય..!!
એક શબ્દ લૌ...??

તારી વાણીમાં
જાણે અમૃત હોય..!!
એક ઘૂંટ લૌ...??

તારા અધરે
જાણે ઝરણી વહે..!!
એક કસ લૌ...??

તારા શ્વાસોમાં
જાણે જીવન હોય..!!
એક પળ લૌ...??

તારા ઉભારે
સૃષ્ટિ સર્જન હોય..!!
સ્નેહ ભરી લૌ...??

તારા અંગોમાં
જો સમર્પણ હોય..!!
કે તો માણી લૌ..??

તારી ચાલમાં
"જગત" આખું ચાલે..!!
બે'ડગ ભરુ...??...jn

happy birthday...

આજનો મંગલ દિવસ
આપના જીવનમાં....

ધૃવના તારલાની તેજસ્વીતા,
ને સુર્ય જેવી સૌર્યતા ભરે...

સરિતા જેવું સાતત્ય ને
સાગર જેવી ગહેરાઇ ભરે...

આકાશને આંબે અેવા વિચાર
ને ધરાના ઉંડાણની સમજ ભરે...

પહાડના જેવી સહનશીલતા
ને ફૂલોના જેવી મૃદુતા ભરે...

ગુંજતો રહે આખાએ જગતમાં,
હ્રદયમાં અેવો અનન્ય પ્રેમ ભરે...

હસ્તી....

ચાલને થોડી મસ્તી કરી લઇએ..
જીંદગીને થોડી હસતી કરી લઇએ...

થકાવશે આ આંધળી દોડધામ..
ટેન્સનની થોડી પસ્તી કરી લઇએ...

ક્યાં સુધી રહીશુ આમ ગુલામ..!
કંટાળાની થોડી વસ્તી કરી લઇએ...

અહંકાર છોડી શબ્દોનો જરીક..
જાતને થોડી સસ્તી કરી લઇએ...

કુતરા બીલાડા બની નથી જીવવું..
જગતમાં થોડી હસ્તી કરી લઇએ...jn

જિંદગી...

જિંદગી જ્યાં એક પુર્ણવિરામ મૂકી જાય છે..
ત્યાંજ જાણે આશ્ચર્ય સાથે અર્થ બદલી જાય છે...

પ્રેમની વ્યાખ્યા જીવનભર જાણવી ના હોય તો,,,
આવતા અંકે શરત લાગું લખાઈ જાય છે...

લાગણી ઉભરાય ત્યારે આ જીવન વ્યર્થ બને..
ને પછી તાજા કલમ લખતા ખીલી જાય છે...

હા વિરહ આવે ભરોસો તૂટવા પણ લાગશે,,
ત્યાં હવે જીવન ને અલ્પવિરામ લાગી જાય છે...

શું કહું હું આ જગત આખા ને કાંઇક તો કહું..
તોય પી.ટી.ઓ. કહી આગળ લખાઈ જાય છે...jn

ચાલને....

ચાલને કાંઇક નવું લાવીએ..
થોડો સ્નેહ થોડો પ્રેમ વાવીએ...

હ્રદયને આમ સાવ કોરુ ના કરી,,
થોડા પ્રેમ તણા પુષ્પો સજાવીએ...

જવાની આમ ચાલી જવાની..
બચપનમાં આંટો મારી આવીએ...

કારણ સાથે સૌ કોઇ મળે છે..
વીના કારણ રમઝટ જમાવીએ...

પ્રેમના નામે રડાવી જાય છે..
આવ તો એકાદ દિલને હસાવીએ...

પોતાના રીસાઇ જાય એ કેમ ચાલે..!
એક નાની સમજણથી મનાવીએ...

જીવ જગતને જગદીશની સમજ..
એક એક માનવ મને અપાવીએ...jn

"જગત"ને માણીએ..

ઠંડીમા ઠરેલી લાગણીઓ ભડકાવીએ..
જામેલા રક્ત માટે તાપણું સળગાવીએ...

અહંમને ઓગાળી, વહેમને પાછો વાળી..
વિશ્વાસની અડગ દીવાલ ચણાવીએ...

હૈયાનો હાંફ કજીયા કંકાસનો કલશોર..
ચાલ હ્રદયની રમજટ મનથી જમાવીએ...

મિલને માણી મિઠાસ ને વિરહની વેદના..
ચાલને એને દુલહન બનાવી વળાવીએ..

ભૂલીજા આ ભૂલો ને "જગત"ને માણીએ..
આવ પાસે તો હવે  મધુરજની મનાવીએ...jn

પ્રેમ એટલે...

બંધ આંખોમાં
કોઇનો સ્પર્શ થતાજ
હ્રદયના કાનમાં
ક્યારેય
ના માણેલું
ના સાંભળેલું
સંગીતનું રેડાવું...jn

પ્રેમ એટલે...

જેને
પહેલી નજરે
જોતાજ
એની જ સાથે
આખું જીવન
વીતાવવાનો
મનનો નિર્ણય...jn

સાગર...

ગરજ્યો અંતર આખું ભરીને  તોય વરસ્યો નહીં...
વરસી મુશળધારે ભલે તું, તોય પલળ્યો નહીં..

સરિતા બની સરતી હતી કુંવારિકા તું રહી..
સાગર ઘુઘવતો હું, ભળીને તોય છલક્યો નહીં...jn

લઇ લો....

અમનના આનન ઉપર લટકતી આશા ભરેલી કટાર લઇ લો..
ગગનના પાલવ ઉપર ચમકતી આ તારલાની કતાર લઇ લો...

સતત તમારી જ આશ લઇને ભલે ફરીએ અમે અધીરા.!
નયન ભરેલા હરખ તણાં આંસુનો અમારો,  ચિતાર લઇ લો...jn

પ્રેમ એટલે...

આંખોથી આંખોનું
મિલન થાય ને
કંઈક નવી
લાગણીઓ જન્મે,
હ્રદયમાં
એક નવી
ધબકાર ઉછળવા
લાગે ને
મનના મહેલમાં
ડગલા માંડે....jn

હું હું ને હું જ હોઇશ...ગઝલ...

લખી નાખ કાગળ ઉપર આ અક્ષરને, ગમે તો..!!
હશે એજ એ લાગણીઓ, જરાક જો જમે તો..!!

અક્ષરને છુપાવ્યા, તો પણ ફાવશે વાંચવાના..
નયન વાંચવાની નિશાળે, ભણેલા અમે તો...!!

દબાવી ભલે હોય દિલમાં જ મારી એ ચાહત..
છુપાવીશ કેમ એ, જો તારા હ્રદયમાં રમે તો...!!

નહી જઇ શકે ક્યાંય મારા વગર એકલી તું..
ભરી તો જો ડગલા એ રાહે,  વજન જો ખમે તો...!!

"જગત" સાવ નાનું બન્યું છે હવે આ દિલમાં..
લે દર્પણ ને જો હું જ હોઇશ, નજર જો નમે તો..!!..jn

અભિલાષા...ગઝલ...

છોડમાં રણછોડ ને ભાળે ભલી એવી નજર ક્યાં..!!
મૂર્તિમાં માધવ વસેલો છે મને એની ખબર ક્યાં..!!

જેમ વસ્ત્રોમાં શરીર હો એમ છું હું  આ જગતમાં..
હર હ્રદયે બેઠો છે ઇશ્વર આ સમજ કેરો ઉત્તર ક્યાં..!!

સૌ કહે છે પણ કરે છે કોણ, મતલબી દુનિયામાં...
ઝેર પીનારા મળ્યા, પીનાર સૌ ભોળા શંકર ક્યાં..!!

પાર્થ ભૂલે રાહ ને હેઠે મુકે એ તીર કામઠું..
ઊઠ ઊભો થા કહે, એ કૃષ્ણ જેવા રાહબર ક્યાં..!!

માંગવા પડશે ખુમારીના હિસાબો બાગ પાસે..!
આ વિચારોની સુવાસ ભરે અહિં એવા અત્તર ક્યાં..!!

પાળિયા જેવા બની હર કોઇ ચાહે છે પુજાવા...
આ "જગત" પણ યાદ કરવા ચાહશે, એવી કબર ક્યાં..!!..jn

જીવન જંગ...ગઝલ...

લડીશું જંગ આજે તો ધનંજય ખાસ લાવ્યો છું..

લે આ ધબકાર ને તારા જ કામે શ્વાસ લાવ્યો છું...

છે દુર્લભ જ્યાં જનમ, ત્યાં વેદનો વિશ્વાસ લાવ્યો છું..

હ્રદયમાં રામ બેઠો, એ સમજનો પાસ લાવ્યો છું...

જવાના કેમ આ દિવસો વિયોગ તણા હવે મારા.!

કહીદે રામ-સીતા જેટલો  વનવાસ લાવ્યો છું...

જો ફુંકાશે એ રણશીંગા, હણીશું દુશ્મનો આજે..

મહાભારત ભણેલા યુદ્ધ વીરો ખાસ લાવ્યો છું...

હણાશે આજ આંતરિક ને બહારી વિશ્વના શત્રુ..

જો યોગેશ્વર તણી ગીતા ભણેલી આસ લાવ્યો છું...

રહે ના કોઇ ખૂણો આજ બાકી તારા વિચારોથી..

સુદામાંના સહિત નરસિંહ જેવા દાસ લાવ્યો છું...

"જગત" આખું હવે લાગ્યું છે સૌને આમ ચાહવા જેવું..

છે એવી પ્રેમ કેરી, આજ એ દરખાસ લાવ્યો છું...jn

પ્રેમ એટલે...

હું જ્યારે સાંજે
ઘરે પાછો આવું
તને જોતાજ
એક નવું જોમ,
એક નવી તાજગી,
એક નવી સ્ફુર્તિનો
મારામાં જનમ...jn

પ્રેમ એટલે...

મારી તમામ
તકલીફોને ભૂલી
તારા એક એક
અરમાનોને
પુરા કરવા
અથાગ બનીને
મારું મથવું....jn

પ્રેમ એટલે...

તારી આંખોમાંથી
સતત એકધારા
આંસુઓ વહેતા હોય,
ને એ જ સમયે
તારી સામે હું આવું
ને એક બુંદ મારી
આંખમાંથી છલકે
ને બીજી જ પળે
મને આલીંગનમા ભરી
તારા આનન પર
એક સ્મિતનું રેલાવું....jn

પ્રેમ એટલે...

દર વખતની જેમ
કોઇ ખાસ દિવસે
મારી આપેલ
ભેટ કરતાં
મને યાદ છે
એ દિવસ....
એ પળની ખુશી....jn

પ્રેમ એટલે...

એક નાનકડા
કોડીયામાં દીપ
પ્રગટતો હોય,
હજારો માઇલની
ઝડપથી વાયરો
વાતો હોય,
તેમ છતાં એ
દીપક નહિ
બુજાય આવો
અડગ વિશ્વાસ....jn

પ્રેમ એટલે....

રોજ સવારે
કબાટમાંથી
તું જે કપડા
બહાર મુકુ
ને મારું હોશે હોશે
એને પહેરીને
મલકાતા રહેવું...jn

પ્રેમ એટલે...

શબરીએ કરેલા
એઠાં બોરને
જાણતાં હોવા છતાં
હોશભેર ખાવા ને
તૃષ્ટિનો આસ્વાદ
માણવો....jn

પ્રેમ એટલે...

તને રોજ રાતે
સુવડાવા આવું
ત્યારે...
પપ્પા પપ્પા
એક વાત કહું
એમ કહી
મારા ગાલ પર
એક મસ્ત મજાનું
વહાલ ભર્યું
ચુંબન.....jn

HAPPY DIPAWALY

દિવાળી એટલે....
અંધકાર પર પ્રકાશનો વિજય,
મારા જીવનમાં રહેલા વિકારો,
રાગ-દ્વેશ, વ્યસનો જેવ અનેક
દુર્ગુણોની સફાઇ કરવી...
મારા ઘરને જેમ દીવડાથી
સજાવું છું એમજ મારા જીવનને
મારા અંતરને પણ સજાવવાનો
દિવસ એટલે દિવાળી...
સૌના જીવનમાં સાચા અર્થમાં
દિવાળીનો ઉત્સવ ઉજવાય
એવી આજના આ મંગલ પર્વે
જગતના તાતને મારી પ્રાર્થના..jn

HAPPY KALI CHAUDASH...

મહાન શક્તિની ઉપાસનાના
આજના મંગલદીનની શુભેચ્છાઓ..

અશક્તિ જે બીજાને
પીડા આપવા માટે વપરાય..

શક્તિ જે માત્રને માત્ર મારા
માટે જ હું વાપરતો રહું...

કાલી કે જે પરકાજે બીજાને
માટે મારા થકી વપરાય...

મહાકાલી એ કે જે ફક્ત ને
ફક્ત પ્રભુ કાર્યાર્થે વપરાય...

અશક્તિ, શક્તિ, કાલી અને મહાકાલી આજના અનન્ય દિવસે મારે કોની ઉપાસના કરવાની..??

આજના મંગલદીનની
સૌને શુભેચ્છાઓ....jn

પ્રેમ એટલે...

તારા દિલની દોરનું
મારા દિલ સાથેનું
એવું ખેંચાણ
કે તું તારામાં ના રહે
ને હું મારામાં ના રહું
બન્નેનું જગત
એકાકાર બની જાય....jn

પ્રેમ એટલે...

જ્યારે તું કોઇકની
સાથે વાત કરે ને
મારુ તારા
મૌનને સાંભળવા
સતત તારી આંખોમાં
તને જોયા કરવું....jn

માળો...

ઘરમાં ચકલી બાંધે માળો, 

ઘર જેવો સથવારો ઘરને..

લુપ્ત છે પ્રજાતી, ક્યાં ભાળો 

ઘર જેવો સથવારો ઘરને..jn

મઝધારે ઘર કરીએ રે...

દરિયાની રેતી તું  ને હું કાંઠાની ઘુળ ભળીએ રે..
ચલ દરિયાના મોજાં બનીએ મઝધારે ઘર કરીએ રે...jn

પ્રેમ પણ ગ્યો...ગઝલ...

મજાના જીવનનો ભલે પ્રેમ પણ ગ્યો..
લે આજે આ ધબકાર પણ એક ક્ષણ ગ્યો...

લટકતી લટો ને નજર પણ નશીલી..
નયનમાં અમારા ભલે એક કણ ગ્યો....

હવે તો પુજન પણ તમારું જ કરશું..!
હ્રદયના ચબુતરે પડ્યો એક ચણ ગ્યો...

ચડ્યો છે નશો જે મને લાગણીનો..
ને મનના વજનમાં હવે એક મણ ગ્યો...

છુટી ગઇ હવેતો "જગત"ની જફાઓ..
કે'વાતો સમજદાર એ એક ગણ ગ્યો...jn

શ્રદ્ધા...ગઝલ...

હોઠ પર હાસ્ય ને લાવે વારતા હળવાશની..
અાંખને કાજળ સુણાવે વારતા કાળાશની...

આ હ્રદયના દર્દને જાણી છતાં બેઠા છે એ..
કેમ કાઢીશું દિલે ખારાશ ને કડવાશની...

બાંધશો ના કોઇ અમને ખોટ જેવા સ્નેહથી..
જાણ છે અમને ભલી આ જગ તણી ભરમાસની...

ક્યાં જુદા છીએ તમે ને હું, આ મનથી એકરુપ..
ક્યાં જરૂર છે આપણે તો કોઇના સહવાસની...

વિશ્વને સંભાળતા જગતાત પર વિશ્વાસ છે..
આમ ભરપેટે જમી શ્રદ્ધા ભલે ઉપવાસની...jn

ખુમારી...ગઝલ...

અાપે સહારો ડૂબતાને શક્તિ અેવી તરણાંમાં,
બુંદો ભળાવી સાગરે ભક્તિ એવી ઝરણામાં...

સૂવું ભલે બહાનું છે, તમને આમ મળવાનું હવે..
બાકી તો ક્યારે થઇ છે મુલાકાત એવી સમણામાં...

આઝાદ થઇ માણસ બન્યો ગુલામ ભોગોનો ફરી..
ક્યાંથી ધરે તાકાત ગાંધીની.! છે એવી ધરણામાં..?

ફેલાઇ ગ્યો પ્રકાશ ચોગમ પ્રેમ કેરા બાગમાં..
સુવાસ થઇને કસ્તૂરી મ્હેકે છે એવી હરણામાં...

હું પૂર્ણ છું, હું પૂર્ણનો આવું જગત ઝંખાય છે..
જગતાત આપે એ ખુમારી, હોય એવી ભરણામાં...jn

પ્રણય...

કોણે કહ્યું કે આજ પ્રણયમાં મજા નથી!
જોતો ખરા અહીં હમણાં આવ જા નથી...

મેં ક્યાં કહ્યું કે આમ સમય દો તમે હવે..
તમને તો રોજ રોજ જવાની રજા નથી...

દુરથીજ આમ મળ, લે હવે ક્યાં દુરી રહી..
કોણે કહ્યું કે આજ પ્રણયમાં મજા નથી!...jn

મહેકશે આ ઉપવન...ગઝલ...

હતી નટખટ અને નાદાન એવી બંદગી મારી..
ફૂલો માં સાચવીતી ભૂલ થી મેં જિંદગી મારી...

ભમર થઇ ગુંજતા ને એક એક કળી અમે ચુંમતા..
કહે સૌ  પ્રિત મારી આ જ છે દીવાનગી મારી...

વિશાળ ગગન અપાર ધરા ને ત્રીજું આ હ્રદય મારું..
લે દિલ ફાડી ને વરસાવ છે પરવાનગી મારી...

સબંધો ખોટ જેવા પણ અમે ભરચક બનાવ્યા છે..
નિભાવી આમ ચાલ્યાં એકલાં એ સાદગી મારી...

જગત આખું જશે ખીલી ને ફેલાશે ખુશ્બુ ચોગમ..
મહેકશે આજ ઉપવન જોઇલે એ તાજગી મારી....jn

જે. એન. પટેલ ( જગત )
લગાગાગા *4

i love u so much....ગઝલ...

આવે છે વાત હવે અધર પર આજ તો કહીને રહીશ.
ઇકરારના ખુલ્લા ઇશારા આમ તો કરતો થઇશ...

લખ મારું નામ હવે હથેળીમાં પછી તું જોઇલે..
વસમી વિરહની વેદનાને હું જ મારામાં લઇશ...

યુગ યુગ ગવાશે આમ ચાહતની કહાનીઓ હવે..
સોળે સજ્જમાં આવ હું ઘોડે ચડી લઇને જઇશ...

મનમાં જે છે તેં આમ ક્યાં સુંધી જગતમાં લઇ ફરું..
ચલને અક્ષર જો તો પ્રથમ આ પંક્તિના એ કહી દઇશ...jn

પ્રેમ એટલે...

કોસો દૂર હોવા છતાં
બંધ આખોની અનુભુતીમાં
અધરોના મૌનને,
તારી એક એક હરકત
ને ચહેરાના ભાવ સાથે
તારા હ્રદયમાં ચાલતા
સ્પંદનોને મારામાં માણવા..jn

પાગલ દીવાની...

એક  સભા અંધારાએ યોજી  છે  પાગલ  દીવાની..
એક છે રાધા ને બીજી છે મીરાં પાગલ દીવાની..

જાણુ છું જ નથી આવાની પણ વિશ્વાસ છે મારો આ..
દોડીને આવીશ હવે એટલી છું પાગલ દીવાની...jn

પાંડુરંગી....

પવન સાથે પગલા માંડી મનમાં હું મલકાતો..
ગીત ગીતાના ગાતો ગાતો જીવન ડગલા ભરતો...

પ્રભુના ખોળે બેસીને જીવન વૈભવ માણતો..
ગલીએ ગલીએ જઇને આજે પ્રભુનુ કામ હું કરતો...

ક્ષીણ બની પટકાતી જાતી ભોગવાદમાં દુનિયા..
નિરપેક્ષ બની હરએક હ્રદયને તારે કાજે મળતો...

બની શકું હું કરી શકું હું ઋષીઓનું સંતાન..
વેદોની એ વાતો આજે હું જીવનમાં ભરતો...

દાદાને સોંપ્યુ છે અમે તો જીવનનું સોપાન..
રંગો છાંટી જગતમાં હું પાંડુરંગી બનતો....jn

પ્રેમ એટલે...

તારી સંવેદનાઓમાં
મારા અહેસાસોને ભેળવી
આંખોના રસ્તેથી
મનના મહેલમાં રહીને
તારા હ્રદયની
રાજધાનીમાં મારુ રાજ...jn

પ્રેમનું માપ....

આમ શું વળી
રોજ રોજ પૂછ્યા કરવાનું
મને કેટલો પ્રેમ કરે છે..!!
એકવાર કહ્યું છે ને
મને બસ ચાહવાની
આદત છે માપવાની નહી..!
તેમ છતાંય માપવોજ હોય
મારો પ્રેમ તારા જગતમાં
તો ચાલ આંખ બંધ કર
તારા રોમે રોમ કહેશે....jn

ઘાયલ છીએ....

કેટલાય તોફાનો
આવ્યા ને ચાલ્યા ગયા
પણ અમે હજુ
તમે આવશો એ જીદ
પર અડગ છીએ..
એ વાત જુદી છે
તમારો એકજ સ્પર્શ
અમને આજેય ઘાયલ
કરી જાય છે.....jn

પૂર્ણ શ્રદ્ધા.....

પ્રેમ અને લાગણીઓને
સમજવા મન અને બુદ્ધિની
જરુર નથી રહેતી,,
કારણ મન ચંચલ છે
અને બુદ્ધિ અધુરી છે...
એટલેજ હ્રદયથી બાંધેલા
સંબંધમાં પૂર્ણ શ્રદ્ધા ને
વિશ્વાસ હોય છે માટે જ
 છેલ્લા શ્વાસ સુંધી આ
"જગત"માં ટકેલો રહે છે....jn

મનની મૂરત...

મન મંદિરે મૂરત તારી લઇ ફરુ છું..
તારા પ્રેમનું પુજન આજેય કરુ છું...

જાણે ભવોભવની હોય કોઇ ઓળખ..!
મનને  હરપળ તારામાંજ ધરુ છું...

સાચવજે આ શ્રધ્ધાની માળા તુટેના..
માળા કરતાંય વધારે જાપ કરુ છું...

લાંબુ જીવું એનાથી ચાર પળ બસ છે..
રોજ દુઆમાં તારીજ ચાહના ભરુ છું...

દુનિયાદારી ભલે છૂટી જાય મારાથી...
આ આભાસેજ હવે જગતમાં ફરુ છું...jn

બગાવત...ગઝલ...

હ્રદયની અમોએ મરામત કરી છે..
તમે જ્યારથી ત્યાં અનામત કરી છે...

સબંધને સજાવી તમે આમ દિલમાં..
તમોએ જ અમ મન વિરાસત કરી છે...

હતું ક્યાં કશું આ લકીરે અમારી..!
તમોએ જ મારી ઇબાદત કરી છે...

તમોને મળી પ્રેમને રાહ ચાલી..
હ્રદયના ઝરૂખે બરામત કરી છે...

જીવન માણવાંનું મળ્યું છે બહાનું..
તમે સ્નેહની જ્યાં શરારત કરી છે...

વદન તો જુઓને અલગ છે બધાંના..
ને ઇશ્વર તે કેવી કરામત કરી છે...

લડીશું જીવનજંગ, જીતીને ય હારવા..
"જગત"માં અમેતો બગાવત કરી છે...jn

રામ નામ...ગઝલ...

લાવ ભરને એક પ્યાલો, આંખથી એ જામ ચડશે..
લાગણીઓનો નશો તારે જ કારણ આમ ચડશે...

જાણતાં હોવા છતાં હું તો ગુનો કરતો રહું છું..
હોય કર્મોની દિશામાં નર્ક, સ્વર્ગે નામ ચડશે...

હમસફર સાથે હવે ક્યાં ચાલવાના આ ભવેતો..
પોત પોતાના હિસાબો માંગશે, જે દામ ચડશે...

માફ કરશું બસ અમે, પણ આમ કુદરત ક્યાં મુકે છે..!
જે હશે  ચિત્રગુપ્ત કહેશે એ પ્રમાણે કામ ચડશે...

આ દિલાશા કામમાં ક્યાં આવશે એના "જગત"માં.!
લઇ જશે એ ડાઘુ જ્યારે નામ મુખમાં રામ ચડશે...jn

શું લખી આપું બોલ...??

નખશીખ તારામાં રહું છું એ
કે પછી એક એક અંગોનું
આલીંગન લખું ..!!
તારામાં ભરેલો પ્રેમ લખું કે
પછી મારા પ્રેમની પરાકાષ્ઠા..!
મનની મોકળાશ તું જાણે છે ને
અંતરનું ઉંડાણ તે માણ્યું છે..
નજરમા તરતી તસવીર લખું
કે બંધ આંખોમાં રમતું સમણું..!
લાગણીઓની ભાષા તને
સમજાય છે કે કેમ...!!
પણ મને આમ લાગણીઓ
છલકાવાની આદત છે...
જગતના કણે કણમાં જગદીશ
ને હું તારા રોમે રોમમાં...
બોલ હજુયે કાંઈ લખું કે..!!..jn

કવિતા...

બુંદોને વીણી વીણી
બનાવી છે કવિતા..

જાણું છું તને ભીંજવી
જાય છે કવિતા...jn